迎來「黑天鵝」時代！談民主的素養

　　黑天鵝，2016年最熱門嘅詞語之一。大家見親啲天鵝，都係白色嘅，黑色嘅天鵝，唔只代表打破常規，更加係異於尋常，無人預計會真實發生，但結果，都係出現咗。呢隻黑天鵝，今年喺地球上出現唔只一次，而係兩次，嚟緊仲可能有第三次。而且，都係號稱民主大國出現，佢全名，叫「民主黑天鵝」。 

　　支持專制統治嘅人，今年好似迎來一場場勝利咁，脫歐、特朗普、恐襲、再脫歐、股災，呢啲詞語，令佢哋可以大聲疾呼「你睇吓民主帶咗幾多麻煩出嚟！」呢種心態，就係黃子華曾經提出嘅「魚蛋理論」：自己過得唔好，見到人哋都過得唔好就會開心。咁樣諗嘢嘅人，喺中國特別多。香港作為中國嘅領土，當然亦都唔例外。 

　　特朗普喺選前，曾經多次批評這次選舉被民主黨背後的財團同傳媒操控，「The election is rigged」是Trump的名言，指控選舉被扭曲。最後一場電視辯論期間，主持人問兩位候選人，如果敗選，會否接受結果，希拉莉表示會接受，特朗普就強調自己會勝出選舉，被追問下先至回答，若果敗選，可能會訴諸司法。佢嘅言論令人憂慮，佢，以及佢所代表嘅群體，會唔尊重呢個民主制度，唔只係民主黨嘅敵人，更有成為「民主敵人」嘅趨向。

　　到今日，呢場「扭曲」嘅選舉，由一個曾經指控佢「扭曲」嘅人勝出，可能就係最大嘅諷刺。而選舉結果，就反映呢個老牌民主大國，城鄉矛盾極深，睇住CNN嘅開票地圖就會一目了然，睇返每一個州份嘅勝選分布，藍色係民主黨、紅色係共和黨，大城市同附近地區，絕大部分係染藍，但其他「鄉郊」地區，尤其是中部各州，盡是紅色天下。兩黨各自都未能取得社會各階層的支持，兩極情況嚴重。呢個亦係佢哋事但一個人當選後，需要面對嘅一個事實。特朗普嘅勝選演說亦都已經暗示，佢一大堆民粹嘅競選口號唔會實現到，因為而家真係要管治個國家。

　　當然，佢同大家講，「我要成為全部美國人嘅總統」，要撫平過去一段時間造成嘅國家裂痕，聽落同4年前嘅3月，喺香港灣仔會展登上最高權力寶座嗰個人，口中嘅「冇唐營、冇梁營、只有香港營」好類似。前車可鑑，所以都係聽住先。

　　香港好多人都睇到笑呵呵，話美國揀個癲佬出嚟，情況完全就係一個貧窮戶，行過馬會，笑一個中產輸咗場馬。  

　　但係，喺呢幾日大家就真正體會到，民主選舉會帶嚟「不確定性」，但係一套成熟制度，總有佢自我復原嘅能力，可以解決所帶來嘅陣痛，可以推動一個社會各部分，思考點樣去顧及每個階層，而唔係取悅某一小撮特權份子。而有民主呢回事，的而且確係令人有得揀，而且即使後悔，都係自己嘅選擇，可以運用民主制度嘅程序，包括自行發聲、或透過民選代議士、以至喺下次選舉改變自己嘅選擇。呢個先係民主制度嘅全部，希拉莉嘅落選宣言，就正正強調，美國嘅憲政民主，係大家都應該珍而重之嘅一件事，民主唔係剩係一場選舉咁簡單，而係每分每秒，每個人生活緊嘅氛圍，如何掌握自己嘅命運。特朗普勝算之所以唔係咁黑嘅「黑天鵝」，就係因為大家知道佢惡唔出咩樣。

　　撐專權嘅香港人最騎呢嘅，就係呢十幾廿年，呼吸住自由嘅空氣，投完票，就覺得民主就係得咁多。其他時間回歸喺威權之下，覺得凡事要以「唔好得罪上頭」為大原則，默默咁望住香港呢個半民主體制，向專權體制拉近一大步。當人哋探討點改良套民主體制，我哋重喺度為一啲虛妄嘅所謂「國家尊嚴」，而放棄更加實質嘅「議會話事權」，甚至「法院話事權」。統治緊我哋嗰個國家，舊年先通過法例，叫啲官員宣誓效忠，佢哋竟然可以對我哋一件本身有案例可循嘅小事喺度指指點點，重要出埋本冇法律效力嘅說明書靠嚇（僭法說明書沒有法律效力的講法，引自基本法委員會委員陳弘毅接受電視台訪問時的表述），意圖要脅代表近百萬民意授權嘅議員，我哋卻仍然鬧緊呢一班被打壓嘅人。

　　所謂國家尊嚴，所謂港獨，全部都係稻草人，揭開假面具後，結論就係要摧毀香港嘅選舉制度，令立法會變人大，只識舉手，不懂反抗，個個聽聽話話，不容許一絲「獨立」思維。

　　不過，講咁多，都係市場最實際。市場，最自由，最民主，雖然貧富懸殊，但係最反映世界實況。 

　　市場話我哋聽，特朗普勝選，環球恐慌半日，第二日，「太陽照常升起」，指數亦都跟住升起。人大僭法？法治、民主消失？咩嚟架？食得架？「太陽一直都在」，市場不動如山。影響唔到荷包嘅嘢，理得你死。